KUNG BAKIT NGA BA SA ST. LUKE'S GINAGAMOT SI MISIS
Mahal sa St. Luke's, sabi ng mga kakilala, kasama, at ilang kaibigan ko sa akin. Bakit hindi na lang kayo nag-public hospital?
Natanong nila iyon dahil totoo. Mahal nga naman sa St. Luke's at kami'y hindi naman mayaman. Ako nga'y pultaym na aktibista, at halal na sekretaryo heneral ng dalawang organisasyon - ang pambansang samahang Kongreso ng Pagkakaisa ng Maralitang Lungsod (KPML) at ng Ex-Political Detainees Initiative (XDI). Dalawang samahan na pawang maralita ang kasapian. Sekretaryo rin ng grupong Kaisahan sa Kamalayan sa Kasaysayan (KAMALAYSAYAN). Kahit ang pagiging editor ko sa pahayagang Taliba ng Maralita ay di naman sapat ang kinikita. Kahit ang pagiging pangulo ko ng Saniblakas ng Inang Kalikasan (SALIKA) ay boluntaryong gawain at walang sahod. Tapos sa St. Luke's ko dinala si misis. Bakit nga ba?
Nais kong sagutin ang mga ganitong katanungan. Nagkakilala kami ni misis dahil sa environmental movement. Noong kagaya kong boluntaryo sa mga organisasyon si misis, pag sumasakit ang kanyang tiyan ay sa public hospital talaga siya nagpapadala. Ang natutukoy na sakit niya ay acid reflux, GERD, at gall stone.
Nobyembre 2021 ay nagkatrabaho si misis bilang registered social worker sa isang ahensya ng gobyerno, at nagkaroon ng plantilla position. Bukod pa iyon sa kanyang pagiging facilitator sa mga NSTP students sa kolehiyo. Sinabi niya sa akin na dahil may sapat na sweldo na siya, upang malaman niya at matukoy talaga kung ano ang sakit niya, sa St. Luke's na kami magpatingin. Kahit magkautang-utang, basta malaman niya talaga kung ano ang kanyang sakit. At sabi pa ni misis na kung mamamatay man daw siya, at least ay alam niya kung bakit.
Madaling araw ng Oktubre 23, 2024 ay sumakit ang kanyang tiyan, at nagpadala na siya sa St. Luke's QC, at doon ay nag-MRI at nag-CT Scan na siya, at nakitang may blood clot siya sa bituka. Ibig sabihin, malapot ang kanyang dugo sa bituka na dahilan ng bara at pananakit ng kanyang tiyan. Sabi pa ng mga doktor, stable naman daw ang kanyang gall stone at hindi iyon ang problema. Nakita ring mayroon siyang mayoma.
Inoperahan siya noong Oktubre 26, 2024, at mula noon ay binibigyan ng blood thinner. Nagtagal pa kami sa ospital dahil nagkaroon siya ng hospital-acquired pneumonia na 14 na araw ang gamutan. Tumagal pa ng ilang araw upang mapapirmahan sa 14 na doktor ang isang promissory note. Hanggang sa makalabas kami matapos ang 49 na araw sa ospital, Pandaigdigang Araw ng Karapatang Pantao 2024.
Enero 7, 2025 ay muli siyang naospital at nagpadala siya sa Quezon City General Hospital, sa payo ng doktor na kinonsulta niya, dahil di bumababa ang kanyang blood pressure na umabot ng 180. Enero 15, 2025 ay nabayaran na ang professional fees ng 14 na doktor matapos makapangutang sa isang kooperatiba.
Unang linggo ng Pebrero, di ko tiyak ang saktong petsa (maliban kung titingnan ko ang petsa sa reseta), ay muli siyang nadala sa QC General Hospital, nang tinanggihan siya ng una naming pinuntahang public hospital, sa Kidney sa East Avenue, dahil wala raw available na kwarto. Sumakit kasing muli ang kanyang tiyan at panay ang suka. Balak niyang sa Kidney magpaospital dahil public hospital ito, at kahit paano'y hindi katulad ng presyo ng St. Luke's ang gamutan.
Pebrero 26, 2025, galing sa kanilang opisina, ay isinugod siya sa St. Luke's dahil muling sumakit ang kanyang tiyan. Sinabihan siya ng doktor na magpa-admit, subalit ayaw niya. Dumating ako roon bandang ikaanim ng gabi. Nakapagbayad na sila, kasama ang kanyang katrabaho, at muling bumalik sa kanilang opisina upang mag-out. Kinabukasan ay pumasok pa rin siya sa kanilang opis gayong dapat ay magpahinga siya ng 24 oras batay sa bilin ng doktor.
Abril 3, 2025 ng madaling araw, di na niya maigalaw ang kanang bahagi ng kanyang braso, kamay, hita, binti, hanggang paa. Kaya tinawagan ang kanyang doktor sa St. Luke's at sinabihan kaming isugod na siya sa ospital. Sa Emergency Room ay agad dumalo ang Stroke Team batay sa nakasulat sa likod ng kanilang damit. Nagkaroon ng blood clot sa pagitan ng artery at vein sa kanyang utak.
Abril 8, 2025 ay inoperahan na siya sa ulo dahil sa pamamaga ng utak, at kung hindi tatanggalin ang buto sa kaliwang bahagi ng ulo, ay baka mapipi ang mga ugat sa utak at tuluyan siyang ma-comatose. Kaya inoperahan siya agad sa ulo, at sumunod ay sa tiyan dahil sa abscess, o mga nana sa loob ng tiyan. Nang matapos ang operasyon, ipinakita ng doktor na ang nakuhang nana sa tiyan ay halos kalahati ng karaniwang mineral bottle.
Mahal man ang presyo ng pagpapaospital subalit buhay si misis. Ngayon ay nakakapagsalita na siya at nagpapagaling. Narito pa rin kami sa ospital at tinutulungan siya ng mga physical therapist, occupational therapist, at nagsasagawa ng swallowing training sa kanya. Sa ngayon kasi ay naka-NGT siya kung saan may tubo sa ilong kung saan dumadaloy ang kanyang pagkain. Hindi pa siya makalunok.
Sa ngayon ay nagpapatulong ako sa mga kasama't kakilala upang maibsan ang gastusin sa ospital na ang hospital bill ay umabot na sa P1.9M as of Abril 28, 2025 na Statement of Account (SOA), at di pa kasama rito ang professional fees ng mga doktor.
Noong 49 days namin sa ospital ng 2024, labing-apat na doktor niya ay umabot ng P900,000. Kaya halos P3M ang binayaran namin. Marami pa kaming utang na dapat bayaran sa una niyang pagkakaratay sa banig ng karamdaman. Sunod ay nitong Abril, at mag-iisang buwan na kami sa ospital sa Mayo 3.
- gregoriovbituinjr.
05.01.2025
