HULING KANDILÂ NGAYONG GABI
huling gabi ngayon ng Undas
at trabaho na naman bukas
huling kandilâ ngayong gabi
ay tahimik ko nang sinindi
subalit lalagi ko pa ring
ang sinisinta'y gunitain
at kumathâ ng tulang tulay
sa kanya't tanging inaalay
di pa rin ako makatulog
katawan sana'y di mahulog
kundi maging malusog lagi
nang matupad ang mga mithi
nasasadiwà kita, irog
dagat man ay kati o taog
lalagi ka sa pusò, sinta
sa bawat gabi at umaga
- gregoriovbituinjr.
11.02.2025
Walang komento:
Mag-post ng isang Komento