PAGTUNGANGA SA KAWALAN
natunganga muli sa kawalan
habang lalagda'y inaabangan
habang promissory note ang tangan
habang luha'y kapara ng ulan
doon sa labas na'y bumabagyo
parang pag-alog niring puso ko
parang lagnat sa pagdedeliryo
parang kandilang naupos dito
ang kalangitan ay nagdidilim
ang alapaap ay nangingitim
damdamin ay puno ng panimdim
kawalang di maarok sa lalim
nalilinis kaya ang polusyon
sa lungsod pag umulan, umambon
lilinisin ba ng luhang iyon
ang pusong sawi't aming kahapon
- gregoriovbituinjr.
07.09.2025
* kuha sa ika-11 palapag ng gusaling CHBC ng ospital
Walang komento:
Mag-post ng isang Komento