PAGSINTA
ang isang nobela'y nagwakas na
habang komiks niyon ay kayganda
hinggil sa pag-ibig ng dalawa
mutawi'y "mahal na mahal kita"
tulad din noong nagmamahalan
kami ni misis, pinagsamahan
ay sadyang tigib ng katapatan
hanggang sa dulo ng walang hanggan
pangarap na ito'y mapalawig
ngunit puso'y tigib ng ligalig
ay, wala na ang tanging pag-ibig
di na siya makulong sa bisig
pang-apatnapung araw na pala
bukas nang mawala yaring sinta
tinitigan ang larawan niya
lalo ngayong ako'y nag-iisa
- gregoriovbituinjr.
07.20.2025
* larawan mula sa pahayagang Pilipino Star Ngayon, Hulyo 16, 2025, p.5
Walang komento:
Mag-post ng isang Komento