di ko sukat akalaing darating ang panahon
upang di na makatula't sa lupa'y ibabaon
nais sanang maabot ang pitumpu't pitong taon
makasalamuha pa ang sunod na henerasyon
datapwat sadyang ganyan ang buhay, una-una lang
hubad na isinilang, nakabarong na lilisan
tinatanaw ko, ako ba'y may maiiwang utang
na dapat kong bayaran bago man lang mamaalam
sana'y may nagawa ako sa bayang iniibig
at sadyang nakapamuno sa mga kapanalig
habang sinta'y nakaagapay, ako'y kapitbisig
upang prinsipyong niyakap ay di basta malupig
may panahon upang makapagpahinga't humimlay
ngunit ako'y di payag na basta na lang mamatay
dahil ako'y kikilos hangga't may hiningang taglay
upang sa proletaryo't bayan, buhay ko'y ialay
- gregoriovbituinjr.
11.06.2021
Walang komento:
Mag-post ng isang Komento